விரல் தொடும்
தூரத்தில்
நீ
இருந்தாலும்
தொட முடியா
தூரத்தில்
மனம்...

அந்த தெரு நெருங்கியவுடன்
காரின் ஜன்னல்களை
தன்னிச்சையாக கை மூடும்

நடைபாதை எங்கும்
மனித நரகல்கள்
கழிப்பிடமில்லாத
அடி மட்ட நகர‌ வாழ்க்கையின்
அடையாளமாய்..

நேற்று வந்தபோது
எல்லாம் சுத்தம்
செய்யப்பட்டு
பந்தலில்
அலங்காரமாய்
வினாயகர்
வீற்றீருந்தார்..

இப்படியே
எப்போதும்
இருந்தால்....
என் எண்ண ஓட்டத்தை
நிறுத்தி என் மகன்
கேட்டான்
'இன்னிக்கு இவங்க எல்லாம்
எங்க ___ போவாங்க'

அமைக்கப்படும்...
நிறுவப்படும்...
உயர்த்தப்படும்...
விரிவாக்கப்படும்...
எனும்
எல்லா
அறிவிப்புகளிலும்
மறைக்கப்படும்
அழிக்கப்படும் (காடுகள்)
வெட்டப்படும் (மரங்கள் )
விரட்டப்படும் (மக்கள்)
புள்ளிவிபரங்கள்...